Digiqole ad

Babai i tre fëmijëve nga Kosova kërcënon të dashurën nga Tirana: Më dërgo para, ose t’i nxora fotot

 Babai i tre fëmijëve nga Kosova kërcënon të dashurën nga Tirana: Më dërgo para, ose t’i nxora fotot

Kjo është historia e D. N, një grua e dashuruar me personin e gabuar për të cilin braktisi bashkëshortin dhe deklaroi publikisht lidhjen me SH. H, një 40-vjeçar nga Kosova.

Por kur D. N kuptoi se po shfrytëzohej prej tij, pikërisht në shtetin gjerman ku ishte zhvendosur bashkë me djalin e mitur, ajo i dha fund lidhjes. Një vendim pas të cilit ajo nuk priste pasoja, megjithëse ky parashikim i gruas ishte shumë larg asaj që i ndodhi.

“Ai shkoi në Kosovë dhe aty kërkonte pa fund të holla dhe vlera monetare, në të kundërt më kanoste se do t’i publikonte çastet intime tonat”, deklaroi në policinë e kryeqytetit gruaja menjëherë sapo u kthye në Shqipëri. I dyshuari, dosja e të cilit aktualisht u dorëzua në gjykatë nën akuzën e përndjekjes, ishte ndërkohë i martuar me një person tjetër, ndërsa mbante lidhje paralele me gruan nga Tirana.

“Kur më kanosi që do të merrte në telefon babain dhe ish-burrin dhe do u tregonte fotot, i telefonova secilit dhe u tregova për çfarë bëhej fjalë. Babai mu përgjigj: “do të të mbështes në çdo rast”, rrëfen gruaja. Sipas dosjes që Gazeta “Si” disponon megjithëse gruaja i bllokoi të gjitha komunikimet me Sh.H, ai hapte profile të reja dhe i shkruante. “Po dilja me tim bir kur në rrugë mu shfaq Sh. Kërkoi të bisedonim në të kundërt do të fliste me babain. Nuk pranova. Djali u frikësua. Sapo pashë disa efektivë policie në rrugë iu drejtova atyre”, rrëfen më tej D.N.

Dëshmia e përndjekësit

I janë marrë dëshmi edhe të denoncuarit – deklaron policia në procesverbale, por 40-vjeçari nuk pranon ta ketë përndjekur dhe as shfrytëzuar ish të dashurën. “I dola në rrugë për të marrë orën dhe rrobat që i kisha dërguar me të. E kam ndihmuar kur qëndronte në Gjermani, jo vetëm me të holla, por i kam gjetur punë. Mesazhet ia kam dërguar pasi e doja dhe e respektoja, ndërsa ajo nuk më hapte telefonin”, citohet të ketë thënë i dyshuari.

Por çfarë thotë babai?

Policia bën me dije se ka pyetur edhe babain e gruas, që tregon se mori telefonata nga një person për të cilin ishte paralajmëruar nga e bija. “Në orën 20.00 kur nuk pranova ta takoja, ky numër më kërcënoi. “Tani do më njohësh se kush jam unë dhe do kesh frikë të dalësh në rrugë”, më tha”, rrëfen babai.

Në dosje me procesverbal këqyrjeje janë administruar të dhënat në mesazhe që janë nxjerrë nga aparati i kallëzueses.

Rrëfimi i gruas

“Me Sh. takohesha herë pas here në Hamburg, sidomos gjatë fundjavave. Punoja atje çdo tre muaj dhe kthehesha në Tiranë, pasi nuk mund të qëndroja më tepër. Sh. më tha që ishte i divorcuar, por disa muaj pasi u frekuentuam, ai filloi të shfaqej xheloz, duke inskenuar skena të tilla, “më do s’më do, me kë shkon, me kë më tradhton”, gjëra të pakuptimta dhe të pavërteta totalisht”, rrëfen gruaja.

Më tej D. i tregon policisë se për t’i dhënë mundësi shpëtimi lidhjes, ajo vendosi të jetojë me 40-vjeçarin.

“Që në javët e para u pendova që po jetonim bashkë, problemet po shtoheshin. Por isha e përkushtuar ndaj tij. Po prisja me padurim të kthehesha në Shqipëri që të ndaheshim të qetë. Një ditë i kontrollova telefonin, aty zbulova që Sh. kishte lidhje të tjera dhe madje e vazhdonte martesën dhe nuk ishte i ndarë, por kishte gruan me tre fëmijë. Një ditë kur u grindëm, telefonova të ëmën dhe i kërkova ndihmë. Por ajo u çudit dhe më pyeti – “kush jeni ju? Djali ka grua dhe fëmijë që e presin”. Ndërkohë Sh. iku në Kosovë me pretekstin se kishte gjashtë vite që nuk kishte takuar ish-gruan. Aty filloi hapur fare të më kërkojë para që t’ia nisja me postë. I dërgova 1700 euro, nuk mundesha më tepër. Sh. nisi nga presionet, më mori në telefon dhe kërcënoi. “Më dërgo më shumë para, përndryshe fotografitë e tua do ia tregoj babait dhe ish-burrit”, më thoshte”, rrë rrefen D.

Sipas materialeve të administruara, pas shumë presioneve dhe kërcënimeve për të fituar sa më shumë para nga e dashura, D. i bëri bllok në Facebook dhe Instagram. Në fashikull gjendet edhe biseda mes ish-burrit dhe të dashurit kosovar, i cili pasi i tregon për fotot intime me D. ai i përgjigjet “Ku e gjen të drejtën që më shkruan? Ç’më duhet mua, ish-gruaja ka jetën e saj”.

I konsideruar si përndjekës nga policia, 40-vjeçari përshkruhet nga ish e dashura edhe si një mashtrues që përfitoi prej saj shuma parash.Express

Digiqole ad

Të ngjashme