Minatorët e Trepçës futen sërish në grevë, nuk morën rrogat e janarit

Punëtorët e Minierës “Trepça” janë futur sërish sot në grevë, për problemin e zakonshëm. Atyre nuk iu ka dalë paga e plotë e janarit, ani pse tani ka ardhur koha për rrogën e shkurtit.

Gazeta ka siguruar fotografi nga greva, ku duken punëtorët ulur në menzë dhe ka biseduar me një minator, i cili ka konfirmuar se greva po bëhet për rroga.

Sipas tij, menaxhmenti kishte premtuar se pagat e plota do të paguhen brenda shkurtit, pasi në mes të muajit që shkoi u dolën 70% të pagave.

Sidoqoftë, minatorët thonë se nuk e kanë ndërmend të punojnë derisa të rregullohet çështja e pagave.

E kësaj greve të minatorëve, i janë bashkangjitur edhe kolegët e Flotacionit. Një punëtor aty, i ka thënë “Jepi zë” se kanë hyrë në grevë për të përkrahur minatorët.

Ndryshe, situata me Trepçën vazhdon të jetë kaotike, pasi as punëtorët nuk po mund të paguhen, dhe këta të fundit fajin ia lënë menaxhmentit dhe Qeverisë që nuk po i ndihmon.

Duhet theksuar se Qeveria nuk ka dhënë subvencionin të cilin e jep çdo muaj, dhe për këtë pagat s’po realizohen. Për arsyen e njëjtë, minatorët protestuan ditën e premtë.