12 persona janë arrestuar, nga ta 10 zyrtar të institucioneve, dhe rreth 400 mijë euro janë sekuestruar në një operacion të gjerë të Policisë së Kosovës, i cili ndodhi gjatë ditës së sotme.
KALLXO.com mëson se dy çanta me paratë janë gjetur njëra në një tualet të njërës nga shtëpitë e të dyshuarve dhe tjetra në oborr të një shtëpie.
Në një konferencë për media, Kryeprokurori i Shtetit, Aleksandër Lumezi tha se bastisja e sotme ishte rezultat i një hetimi me masa të fshehta që nga muaji janar.
Tutje kryeprokurori Lumezi tha se operacione të ngjashme do të ketë edhe ditëve në vijim.
Drejtori i Departamentit të Krimeve Ekonomike brenda Policisë së Kosovës, Nazim Sahiti tha në konferencë për media se paratë e konfiskuara janë marrje dhe dhënie ryshfeti ndërsa të arrestuarit po dyshohen për keqpërdorim të detyrës zyrtare.
I gjithë operacioni që ndodhi gjatë ditës së sotme, ndodhi nën dyshimet për keqpërdorime të fondeve të subvencioneve.
