Tribunali Ndërkombëtar për Krime të Luftës në ish-Jugosllavi do të vendosë mbi apelin e ish-komandantit serb në Bosnjë, Ratko Mlladiq lidhur me dënimin e tij për gjenocid dhe krime kundër njerëzimit.
Ai u dënua me burgim të përjetshëm në vitin 2017 për pjesën e tij në masakrën e Srebrenicës në 1995, kur u vranë rreth 8 mijë burra dhe djem boshnjakë.
Në seancën e tij të apelit në Hagë gushtin e kaluar, prokurorët kërkuan dënimin e tij për një akuzë të tjetër gjenocidi.
Avokatët e tij kanë argumentuar se ai ishte shumë larg Srebrenicës kur ndodhi masakra, shkruan BBC, transmeton Klankosova.tv.
Masakra e Srebrenicës, e kryer në një zonë që supozohej të ishte nën mbrojtjen e Kombeve të Bashkuara, ishte mizoria më e keqe në Evropë që nga Lufta e Dytë Botërore.
Mlladiq, i njohur si “Kasapi i Bosnjës”, ishte një nga të dyshuarit e fundit që përballen me gjyqin në Gjykatën Penale Ndërkombëtare të Kombeve të Bashkuara për ish-Jugosllavinë. Ai u arrestua në 2011 pas 16 vitesh në arrati.
Në vitin 2017 ai u shpall fajtor për gjenocid mbi Srebrenicën, por u shpall i pafajshëm për gjenocid gjatë fushatës së ushtrisë së tij në 1992, në të cilën boshnjakët dhe kroatët boshnjakë u dëbuan nga shtëpitë e tyre ose u arrestuan në kushte të tmerrshme.
Në 2016, e njëjta gjykatë dënoi ish-udhëheqësin serb të Bosnjës Radovan Karaxhiç për planifikimin e masakrës së Srebrenicës, ndër krime të tjera.
Dënimi i tij fillestar 40-vjeçar për gjenocid dhe krime lufte u rrit më vonë në burgim të përjetshëm në 2019 – pjesa tjetër e së cilës ai do të shërbejë në Mbretërinë e Bashkuar.
Ratko Mlladiq ishte zbatuesi i një komploti politik, i krijuar në krye, për të zhdukur pjesë të popullsisë myslimane të Bosnjës.
Pastrimi etnik filloi me përndjekjen – propaganda i ktheu fqinjët kundër njëri-tjetrit – dhe për shumë mijëra përfundoi kur njerëzit e Ratko Mlladiq pushtuan bazën e KB në Potoari, një zonë e caktuar e sigurt.
Pikërisht këtu djali 17-vjeçar i Munirës, Nermin, u morr nga krahët e saj, pasi ai u përpoq ta siguronte atë se gjithçka do të ishte në rregull. 22 anëtarë të familjes së saj u vranë në gjenocid.
Ratko Mlladiq kaloi 16 vjet si i arratisur, shumë kishin frikë se ai nuk do të jetonte për të parë këtë gjykim përfundimtar ligjor.
Munira ka udhëtuar në Hagë për të dëshmuar momentin që beson se do t’i sjellë paqen.
Prokurorët këtu shpresojnë që ky gjyq të dërgojë një mesazh që bën jehonë në rajon dhe më gjerë – se drejtësia e vonuar nuk do të thotë që drejtësia të mohohet.
Seanca dëgjimore në gusht ishte vonuar nga problemet shëndetësore të Mlladiqit dhe kufizimet e koronavirusit.
Ai ishte sfidues gjatë gjithë kohës, duke sulmuar edhe gjykatën edhe prokurorin.
Duke folur për Srebrenicën, ai tha se kishte nënshkruar një marrëveshje me ushtrinë muslimane boshnjake për ta nderuar atë dhe zonat e tjera të mbrojtura dhe sugjeroi që ai të mos ishte fajtor për ndonjë shkelje të këtyre zonave.
Por avokati i prokurorisë Laurel Baig tha se Mlladiq ishte dënuar për disa nga “krimet më të urryera të Shekullit 20”.
“Mlladiq ishte në krye të operacionit të Srebrenicës,” tha ajo. “Ai përdori forcat nën komandën e tij për të ekzekutuar mijëra burra dhe djem”, transmeton Klankosova.tv.
Një avokat mbrojtës, Dragan Ivetiq, mohoi që klienti i tij të ketë luajtur një rol, duke thënë: “Z. Mladic nuk është një horr. Ai ishte dikush që në çdo kohë po përpiqej të ndihmonte KB për të bërë punën që nuk mund ta bënte në Srebrenica në një niveli humanitar “.
