Ka më shumë se një muaj që kur në Kosovë ka pasur rënie të lakores epidemiologjike në vend.
Rënia e rasteve të infektimit me coronavirus e po ashtu edhe numrit të vdekjeve bëri që Qeveria e Kosovës të merr vendim për lehtësimin e masave antiCOVID-19.
Sipas të dhënave nga IKSHPK-ja dhe Ministria e Shëndetësisë, që nga fillimi i pandemisë e deri më sot janë konfirmuar pozitiv me COVID-19, 107 mijë e 578 persona.
Por krahas kësaj edhe numri i personave të shëruar arrin në 104 mijë e 894, kurse vdekje janë shënuar gjithsejtë 2 mijë e 250, shkruan Telegrafi.
Në 24 orët e fundit janë konfirmuar vetëm 7 raste pozitive dhe vetëm një rast i vdekjes. Raste aktive në vend mbeten 434. Procesi i vaksinimit të qytetarëve gjithashtu është duke vazhduar çdo ditë në të gjitha qytetet e Kosovës.
Deri më tash numri i qytetarëve të vaksinuar ka arrit në 98 mijë 277.
Ministria e Shëndetësisë ka bërë të ditur se që nga 15 qershori do të nis edhe procesi i vaksinimit masiv, ndërkaq në dispozicion janë vetëm edhe 97 mijë e 933 vaksina.
Ndryshe sot në sallën “1 Tetori” do të vazhdoj procesi i vaksinimit me dozën e dytë të vaksinës për të gjithë ata qytetarë të cilët kanë marrë dozën e parë.
Deri më tani në Kosovë përmes programit COVAX dhe Bashkimit Evropian si donacion kanë ardhur gjithsej 196 mijë 210 doza të vaksinës kundër COVID-19.
Deri tash dihet se MSh ka blerë edhe mbi 1.2 milion doza të vaksinave të cilat do të arrijnë deri në fund të vitit. /Telegrafi/
