Dua Lipa ka nisur një projekt të ri kulturor në Portugali, duke hapur një bibliotekë të dedikuar për libra të ndaluar dhe të censuruar.
Ylli shqiptaro-britanik po e zgjeron angazhimin e saj përtej muzikës me projektin “Manifesto Library”, një hapësirë që pritet të vendoset në qytetin Porto.
Biblioteka do të realizohet në bashkëpunim me librarinë e njohur “Livraria Lello”, e cila konsiderohet një ndër libraritë më të famshme në botë dhe vizitohet nga mijëra lexues e turistë.
Sipas raportimeve, qëllimi i projektit është të mbledhë vepra që në periudha të ndryshme janë ndaluar, censuruar ose kanë sfiduar pushtetin, përjashtimin dhe narrativat dominuese.
“Manifesto Library” pritet të shërbejë si hapësirë për promovimin e lirisë së shprehjes, mendimit kritik dhe rëndësisë së letërsisë në debatet shoqërore.
Ky është një tjetër hap i Dua Lipës në fushën e kulturës dhe leximit, duke e lidhur emrin e saj jo vetëm me muzikën, por edhe me nisma që nxisin diskutim publik.
A mendoni se figura publike si Dua Lipa duhet të përfshihen më shumë në projekte kulturore? Na shkruani në Facebook.
Burimi: Sinjali