Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes, raporton Gazeta Sinjali.
Një rast i tillë ka ndodhur dje në fshatin Vraniq të Suharekës, ku një burrë dyshohet se ka sulmuar fizikisht bashkëshorten e tij.
Burimet e Gazetës Sinjali brenda Prokurorisë kanë bërë me dije se 52-vjeçari dyshohet se ka ushtruar dhunë ndaj bashkëshortes së tij, të cilën e ka kapur për fyti dhe të njëjtës i ka shkaktuar lëndime trupore.
Si pasojë e lëndimeve të marra, gruaja ka kërkuar ndihmë mjekësore në spital, ndërkohë që rastin e ka denoncuar edhe në Polici.
Sinjali mëson se ajo ka bërë me dije para hetuesve policorë se e gjithë ngjarja ka ndodhur për shkak të një mosmarrëveshjeje për veturën e tyre, të cilën bashkëshorti e ka regjistruar në pronësinë e tij.
I dyshuari është arrestuar dhe është shoqëruar në stacion policor për intervistim, ku me urdhër të prokurorit ndaj tij është iniciuar rasti ‘Dhunë në familje’.
