Multimiliarderi Elon Musk beson se inteligjenca artificiale (IA) mund t’i lërë të gjithë pa punë. Sipas tij, inteligjenca artificiale mund të bëhet forca më shkatërruese në histori.

Ai foli për inteligjencën artificiale në Lancaster House, rezidenca zyrtare e Britanisë së Madhe, duke shtuar se IA do ta vinte në dyshim vetë kuptimin e jetës, shkruan CNBC.

“Për herë të parë, ne do të kemi diçka më të zgjuar se njeriu. Është e vështirë të thuhet saktësisht se kur do të ndodhë kjo, por do të vijë një moment kur nuk do të jetë e nevojshme që njeriu të kryejë një punë. Inteligjenca artificiale do të jetë në gjendje të bëjë gjithçka”, ka thënë Musk.

Ai me shaka ka thënë se nuk e dinte nëse njerëzit do të ndiheshin rehat për shkak të kësaj. Musk pret që inteligjenca artificiale të mos ketë kufij.

Musk ka paralajmëruar vazhdimisht për kërcënimet që vijnë nga inteligjenca artificiale. Në një rast, pronari i SpaceX ka thënë se inteligjenca artificiale mund të jetë më e rrezikshme se armët bërthamore.