Gjatë gjysmës së parë të vitit të gjitha kompanitë e sigurimit në vend kanë krijuar profit neto rreth 5 milionë eurosh. Duke krahasuar me periudhën e njëjtë të vitit 2019, fitimi i tyre është u rrit mbi 7 milionë euro.
Në raportin e fundit të Bankës Qendrore të Kosovës (BQK) mbi sistemin financiar, shihet se të hyrat e këtyre kompanive kanë qenë 40.2 milionë euro, shkruan Telegrafi.
Për sa i përket shpenzimeve, 16.5 milionë euro janë dëmet e ndodhura, ku përqindja e pagesës së tyre është 51.5 për qind.
Vlera e dëmeve të paguara për këtë periudhë është 23.4 milionë euro, ku 14 milionë euro janë për palën e tretë.
Kompanitë e sigurimit, në raportin e BQK-së, tregojnë se kanë 208.6 milionë euro asete, prej të cilave pjesa më e madhe është e sigurimeve jo-jetë, apo 190.1 milionë euro.
Raporti tregon se, vlera e primeve të shkruara është 45.4 milionë euro, nga të cilat sigurimet e palës së tretë janë 24.5 milionë euro.
Deri pak para shpalljes së pandemisë COVID-19, sipas statistikave zyrtare të Ministrisë së Punëve të Brendshme, numri i automjeteve të pasiguruara në Kosovë ishte rreth 150 mijë.
Ndërsa, dëmet financiare të shkaktuara nga kompensimi për aksidentet për këto automjete që nga viti 2000 janë 44 milionë euro.
Kështu kishte deklaruar për Telegrafin, drejtori i Shoqatës së Sigurimeve të Kosovës, Sami Mazreku, i cili kishte shtuar se humbjet vjetore të këtyre kompanive janë rreth 4 milionë euro nga mos inkasomi i primit dhe 4 milionë euro të tjera nga sigurimet.
“Deri para se të filloj pandemia e COVID-19, sipas të dhënave zyrtare të Ministrisë së Punëve të Brendshme në sistem figurojnë rreth 150 mijë vetura të paregjistruara. Por që nuk ka një analizë se sa prej tyre mund të janë në trafik. Natyra e këtyre automjeteve që dalin në trafik pa regjistrim i shkaktojnë dëme milionëshe sektorit të sigurimeve. Humbjet vjetore janë rreth 4 milionë euro nga mos inkasomi i primit nga këto vetura dhe nga ana e tjetër janë rreth 4 milionë euro që këto vetura i shkaktojnë nga sigurimi. Nga viti 2000 deri 2019, vetëm për automjetet e pasiguruara, sektori i sigurimeve ka paguar mbi 44 milionë euro”, kishte thënë Mazreku.
Në tregun e Kosovës aktualisht operojnë 13 kompani të sigurimeve, prej të cilave 7 janë me kapital të huaj. Numri i degëve të tyre është 468. /Telegrafi/
