Aksidente të shumta në trafik, një 19-vjeçar në Suharekë përfundon në spital

Numri i madh i aksidenteve në trafik po vazhdon të jetë shqetësues. Çdo ditë raportohet për aksidente të shumta në komunikacion dhe në të shumtën e rasteve shkaktohen si pasojë e pa kujdesisë së shoferëve gjatë vozitjes, duke rrezikuar kështu jetën e tyre dhe të pjesëmarrësve tjerë në trafik, raporton Gazeta Sinjali.

Sipas raportit të Policisë vetëm gjatë 24 orëve kanë ndodhur 11 aksidente, ku si pasojë kanë mbetur të lënduar disa persona.

Sinjali mëson se një aksident trafiku ka ndodhur në Suharekë, ku një veturë raportohet se ka goditur një këmbësor që po kalonte rrugën.

Hapsirë Reklamuese

Burimet e Gazetës Sinjali bëjnë të ditur se si pasojë e aksidentit, ka mbetur i lënduar këmbësori 19-vjeçar, i cili është dërguar në spital për tretman mjekësor.

Shoferi që dyshohet se shkaktoi aksidentin raportohet se ka ikur nga vendi i ngjarjes, por pas veprimeve hetimore nga ana e Policisë, ai është arritur që të arrestohet dhe i njëjti u shoqërua për intervistim në stacion policor dhe më pas është liruar.

E një aksident tjetër ka ndodhur në parkingun e Qendrës Korrektuese në Dubravë, mes një veture civile dhe një veture të Policisë së Kosovës.

Deri te aksidenti dyshohet të ketë ardhur për shkak të një lëvizje të pasigurt nga shoferi i veturës civile, me ç’rast ka goditur automjetin e Policisë.

Si pasojë e aksidentit janë shkaktuar vetëm dëme materiale.