Banorët e fshatit Sllapuzhan dhe zonave përreth prej më shumë se 9 muajsh po përballen me ndërprerje të vazhdueshme të energjisë elektrike, sidomos sa herë ka reshje shiu. Situata është bërë e padurueshme, ndërsa kontaktet me KEDS deri më tani nuk kanë dhënë rezultat.
Sipas banorëve, kompania përgjegjëse nuk ka treguar asnjë interesim për të ndërhyrë, duke i lënë mbi 15 mijë banorë të Sllapuzhanit, Bllacës, Duhelit dhe shumë fshatrave të tjera pa rrymë me orë të tëra, e shpeshherë edhe për 24 orë rresht.
Qytetarët shprehen se kjo gjendje është kthyer në përditshmëri dhe se, pavarësisht ankesave të shumta, nuk ka pasur intervenime konkrete për sanimin e rrjetit elektrik. Ata e konsiderojnë këtë si neglizhencë të hapur nga ana e KEDS-it dhe institucioneve përgjegjëse.
Revolta e banorëve, sipas burimeve nga terreni, sa vjen e rritet. Ata tashmë po shqyrtojnë mundësinë që të organizojnë protesta dhe bllokim të rrugëve kryesore, nëse nuk ndërmerret asnjë masë urgjente për rikthimin e furnizimit normal me energji elektrike.
Banorët kërkojnë përgjegjësi nga KEDS dhe institucionet shtetërore, duke theksuar se është e papranueshme që në shekullin XXI, mijëra familje të mbesin në errësirë për shkak të mungesës së investimeve dhe përkujdesjes.
