Dita e sotme ishte tragjike për familjen Gavazaj nga Zhuri i Prizrenit pasi morën lajmin se familjari i tyre që ishte raportuar i zhdukur që nga muaji shtator i vitit të kaluar u gjet i varur me litar në një lius në malin Poleviva të këtij fshati. Të brengosur jashtëzakonisht shumë për gjithë këta muaj, familja s’kishte asnjë informacion për fatin e tij, raporton Gazeta Sinjali.
Trupi i të ndjerit ishte dekompozuar, ku koka u gjet e shkëputur nga trupi dhe fillimisht s’dihej se për kë bëhej fjalë. Megjithatë posa njësitë përkatëse kanë arritur në vendin e ngjarjes, ka nisur verifikimi i rasteve të personave që janë raportuar të zhdukur dhe shenjat e para çojnë se viktima është 49-vjeçari Gavazaj.
Kjo është konfirmuar edhe nga Policia Rajonale në Prizren, që njoftuan për Sinjalin se nga dokumentet e gjetura në vendin e ngjarjes dyshohet se bëhet fjalë për Behamir Gavazaj, 49-vjeçar, që ishte zhdukur që disa muaj.
Akoma nuk dihen rrethanat dhe detajet e këtij rasti mjaft të rëndë, por ajo që është bërë e ditur është se Prokurori i Shtetit ka urdhëruar nisjen e hetimeve dhe trupi i pajetë që u tërhoq nga vendi i ngjarjes është dërguar në Institutin e Mjekësisë Ligjore për obduksion.
Kujtojmë se Gavazaj nga fshati Zhur i komunës së Prizrenit, ishte shpallur i zhdukur nga 10 shtatori i vitit 2022. Që nga ajo kohë, për katër muaj me radhë familjarët s’kanë pasur asnjë informacion për vendndodhjen e tij. Një muaj më vonë, më 18 tetor, Policia e Kosovës kishte kërkuar ndihmën e qytetarëve për informacione që do të ndihmonin në gjetjen e tij, por nuk pati ndonjë rezultat.