Kryetari i LDK-së, Lumir Abdixhiku ka reaguar ndaj vendimit për ndarjen e 100 eurove për studentët nga qeveria në detyrë e Albin Kurtit.

Abdixhiku ka thënë se Kurti të ardhmen që ua vodhi po provon t’ua blejë studentëve me 100 euro për votë, tre ditë para balotazhit.

“Të ardhmen që ua vodhi, në shtetin më të varfër e më të izoluar në Evropë, me arsimin ndër më të fundit në botë, provon t’ua blejë me 100 euro për votë – tre ditë para balotazhit”, ka shkruar Abdixhiku.

Ai ka thënë se një regjim i frikësuar, trajton studentët si material shitblerje zgjedhore.

“Një regjim i frikësuar dhe në rënie të lirë, po trajton studentët e Kosovës si material shitblerje zgjedhor. Studentët drejtojnë kohë, rrëzojnë regjime e përcaktojnë epokë”, ka shkruar kryetari i LDK-së.

“Prandaj, këta SMS ‘cringe’, para zgjedhjeve nuk blejnë as heshtjen, as shpresën. As votën. I keni nënçmuar. Do t’iu kthejnë përgjigje këtë të diel me votë”, ka thënë ai.

“Kosova është shumë e mençur se sa po e trajton kryepopullisti sot”.