Dy zgjidhje duken në horizont për Lëvizjen Vetëvendosje: ose siguron shumicën parlamentare për të formuar qeverinë, ose Kosova shkon drejt zgjedhjeve të reja. Afati kushtetues për arritjen e shumicës së nevojshme prej 61 votash skadon më 26 tetor, ndërsa partia kryesore në Kuvend vijon të mbetet në heshtje publike.
Albin Kurti ende nuk ka bërë të ditura detaje të negociatave me subjektet e tjera politike. Burime brenda Lidhjes Demokratike të Kosovës (LDK) kanë bërë të ditur se nuk kanë marrë asnjë ftesë zyrtare për bisedime, ndërsa disa deputetë të Vetëvendosjes kanë pranuar se nuk janë njoftuar për ndonjë strategji të qartë lidhur me formimin e shumicës.
Analistët politikë e shohin situatën si paralajmërim për një skenar të mundshëm zgjedhor. Sipas tyre, mungesa e transparencës dhe veprimeve konkrete në negociata është sinjal se koalicioni i nevojshëm është ende larg arritjes. Analisti politik Artan Muhaxhiri vlerëson se me kohën që ka mbetur, më e mundshme duket mbajtja e zgjedhjeve të parakohshme sesa formimi i një qeverie të re.
Në rast se shumica nuk formohet brenda afatit kushtetues, presidentja Vjosa Osmani mund t’i japë mandatin subjektit të dytë për përpjekje të reja në formimin e qeverisë, ose vendi mund të shkojë drejt zgjedhjeve të reja. Situata mbetet e tensionuar politikisht, ndërsa qytetarët dhe analistët presin zhvillimet e fundit që do të përcaktojnë të ardhmen politike të vendit.