Suharekë, 26 Qershor 2025 – Në një aksion të paralajmëruar prej kohësh, ekipet e Inspektoratit të KRU “HidroRegjioni Jugor” SHA kanë filluar sot ndërhyrjet në njësinë operative në Suharekë për të evidentuar dhe shkyçur konsumatorët që janë të kyçur ilegalisht apo që refuzojnë të paguajnë faturat për ujin e shpenzuar.
Ky aksion i cili zhvillohet me mbështetjen e Policisë së Kosovës, synon të vendosë rregull dhe të ndalë keqpërdorimet që dëmtojnë jo vetëm ndërmarrjen, por edhe qytetarët që paguajnë rregullisht shërbimin.
“Zero tolerancë ndaj keqpërdoruesve”, është mesazhi i qartë i kompanisë së ujësjellësit, duke paralajmëruar se aksionet do të vazhdojnë edhe në ditët në vijim në gjithë territorin që mbulon njësia në Suharekë.
Nga KRU “HidroRegjioni Jugor” SHA u bëhet thirrje të gjithë konsumatorëve që të ndërpresin menjëherë lidhjet ilegale dhe të nisin pagesën e faturave të ujit, në mënyrë që të shmangin shkyçjen nga rrjeti dhe ndëshkimet tjera ligjore që rrjedhin nga keqpërdorimi.
Ky aksion është pjesë e strategjisë së ndërmarrjes për rritjen e efikasitetit dhe transparencës në menaxhimin e burimeve të ujit, si dhe për përmirësimin e shërbimeve ndaj konsumatorëve që i respektojnë obligimet e tyre.