Prokuroria Themelore në Prizren, Departamenti i Krimeve të Rënda, ka ngritur aktakuzë ndaj dy personave nga komuna e Suharekës, të dyshuar për dhënie dhe marrje ryshfeti në lidhje me votimin gjatë zgjedhjeve lokale të 12 tetorit 2025.

Sipas aktakuzës, ngjarja ka ndodhur në fshatin Budakovë, ku i pandehuri Y.Rr. dyshohet se ka ofruar 120 euro për të pandehurin B.K., me qëllim që ky i fundit të votojë në favor të një kandidateje për Asamblenë Komunale. Për të verifikuar votimin, Y.Rr. kërkoi të shihte telefonin e votuesit pas votimit, dhe më pas ia dorëzoi shumën e parave.

Në të njëjtin rast, B.K. akuzohet se ka pranuar këtë përfitim financiar me qëllim që të ndikojë në votimin e tij, duke konsumuar kështu veprën penale të marrjes së ryshfetit në lidhje me procesin zgjedhor.

Prokuroria ka propozuar që, pas zhvillimit të shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit.

Rasti pritet të trajtohet në Gjykatën Themelore në Prizren.