Në Gjykatën Themelore në Prishtinë ka filluar seanca e gjykimit në rastin e vrasjes së Liridona Ademajt. Në sallë të pranishëm janë të akuzuarit, Naim Murseli, Granit Plava dhe Kushtrim Kokalla.
Në seancë pritet të dëgjohet edhe dëshmia e ekspertizës psikiatrike që i është bërë Naim Murselit nga ish-drejtori i Psikiatrisë Forenzike, Shpend Haxhibeqiri.
Seanca e fundit në këtë rast ishte mbajtur më 14 korrik, ku dëshmoi pikërisht Leonard Ademaj. Gjatë deklarimit të tij, ai kërkoi dënim maksimal për dorasin, duke theksuar se vrasja e motrës së tij ishte e planifikuar dhe e egër.
Liridona Ademaj u vra më 29 nëntor të vitit 2023 në fshatin Bërnicë të Prishtinës. Në mesin e të akuzuarve për këtë krim është edhe ish-bashkëshorti i saj, Naim Murseli, i cili dyshohet se ka porositur vrasjen. Sipas Prokurorisë, Murseli i kishte premtuar Granit Plavës shumën prej 30 mijë euro për ta kryer vrasjen. I akuzuar tjetër në këtë rast është edhe Kushtrim Kokalla, i cili dyshohet për përfshirje në organizimin e krimit.