Kryetari i Komunës së Suharekës, Bali Muharremaj, ka prezantuar kandidaturën e radhës nga Aleanca për Ardhmërinë e Kosovës (AAK), duke vlerësuar lart përkushtimin dhe përvojën institucionale të Albulena Kokollarit, kandidate nga fshati Budakovë.
Albulena Kokollari është e diplomuar në Ekologji dhe Mbrojtje të Mjedisit dhe ka shërbyer më parë si Drejtoreshë e Inspeksionit, ndërsa aktualisht është në krye të Drejtorisë për Kulturë, Rini, Sport dhe Mërgatë në Komunën e Suharekës. Përvoja e saj në këto funksione, sipas kryetarit Muharremaj, është dëshmi e një pune të palodhshme, vizioni të qartë dhe përkushtimi të vazhdueshëm në shërbim të qytetarëve.
Si Kryetare e Rinisë në Aleancën e të Rinjve në Suharekë, Kokollari ka ndërtuar një lidhje të fortë me brezin e ri, duke kuptuar nevojat e tyre dhe duke u angazhuar për një qytet më të pastër, më të gjallë dhe më aktiv.
“Me vendosmërinë e saj dhe përvojën në institucione, Albulena kandidon për Asamblenë Komunale, për të mbrojtur zërin e qytetarëve, e sidomos të rinisë,” ka theksuar Muharremaj në prezantimin e saj.
Kandidatura e Kokollarit përfaqëson një kombinim të qëndrueshëm mes përgatitjes akademike, përvojës praktike dhe aktivizmit rinor, duke e pozicionuar atë si një ndër zërat më të fuqishëm për zhvillimin ekologjik, kulturor dhe rinor në qeverisjen lokale të Suharekës.