Kryetari i Degës së LDK-së në Suharekë, Ardian Shala, ka reaguar lidhur me vërshimet e fundit, duke kritikuar qasjen që, sipas tij, fokusohet më shumë në propagandë sesa në zgjidhje reale.
Shala ka theksuar se dalja në terren me çizme për spote nuk përbën zgjidhje për problemet e përsëritura me përmbytjet. “Nuk ka kuptim të dalësh me çizme nëpër ujë për spote. Zgjidhja nuk është propaganda, por puna”, ka deklaruar ai.
Sipas tij, Komuna e Suharekës ka kapacitete profesionale për ta trajtuar seriozisht këtë çështje. Ai ka bërë thirrje që inxhinierët e komunës të mblidhen, të hartohen plane konkrete dhe afatgjata, me qëllim që të parandalohet përsëritja e vërshimeve sa herë që ka reshje më të dendura shiu.
Shala ka theksuar se vetëm përmes planifikimit profesional dhe zbatimit të projekteve konkrete mund të mbrohen qytetarët dhe pasuria e tyre nga dëmet e vazhdueshme që shkaktohen nga përmbytjet.