Suharekë, 08 shtator 2025 – Policia e Kosovës ka bërë të ditur se ka arrestuar një person të dyshuar në Komunën e Suharekës, pasi që i njëjti kishte publikuar në rrjete sociale fotografi ku shfaqej me armë zjarri.
Sipas njoftimit zyrtar, rasti është evidentuar më 25 korrik 2025, rreth orës 10:30, ndërsa veprimet operative kanë rezultuar me arrestimin e të dyshuarit ditën e djeshme.
Gjatë kontrollit, tek i dyshuari është gjetur dhe konfiskuar një armë zjarri – pistoletë, si dhe 8 copë fishekë.
Pas intervistimit, me vendim të prokurorit kujdestar, i dyshuari është dërguar në mbajtje për procedura të mëtejme ligjore.
Policia e Kosovës ka apeluar edhe një herë që qytetarët të mos publikojnë materiale që nxisin frikë apo paraqesin vepra të kundërligjshme në rrjetet sociale, pasi çdo rast do të trajtohet me prioritet dhe do të ndiqet nga organet e rendit.