Në kuadër të zgjedhjeve komunale që do të mbahen më 12 tetor, Astrit Salihu është zyrtarisht kandidat për Asamblenë Komunale të Suharekës nga radhët e Lidhjes Demokratike të Kosovës (LDK).
Salihu bart numrin 17 në listën e kësaj partie, me një profil profesional të spikatur dhe me përkushtim qytetar. Ai është ekonomist me përvojë mbi 7 vjet në fushën e financave, bankës dhe kontabilitetit, duke ofruar një bagazh të rëndësishëm për hartimin dhe mbikëqyrjen e politikave zhvillimore në komunë.
Aktualisht, ai mban pozitën e kryetarit të nëndegës së LDK-së në Mushtisht dhe është i angazhuar për një kohë të gjatë në strukturat lokale të partisë. Përmes punës së tij në komunitet, Salihu është shquar si një zë i afërt me qytetarët, i cili artikulon qartë kërkesat dhe nevojat e banorëve të vendit.
Kandidatura e tij është prezantuar nga Dr. Ardian Shala, kryetar i degës së LDK-së në Suharekë dhe njëherësh kandidat për kryetar komune, i cili ka theksuar se përfshirja e Astrit Salihut në listë është një dëshmi e rifreskimit dhe profesionalizimit të ekipit të LDK-së për mandatin e ardhshëm.
“Astriti është zëri i maturisë, besimit dhe përkushtimit – një kandidat që do të sjellë frymë të re në politikën vendore dhe një përfaqësues i denjë për qytetarët tanë në Kuvendin Komunal,” është shprehur Shala.
Zgjedhjet e këtij viti pritet të sjellin konkurrencë të fortë në Suharekë, ndërsa kandidatë si Astrit Salihu pritet të jenë faktorë kyç në përfaqësimin me përgjegjësi dhe vizion të interesave të qytetarëve.
