Në 18-vjetorin e vrasjes së policit Triumf Riza, në vendin ku ai është vrarë është vendosur gurthemeli i një pllake përkujtimore që e nderon atë dhe policët e tjerë të vrarë në detyrë. Në këtë ceremoni, familjarë të policit të vrarë kanë kritikuar sistemin e drejtësisë për vonesën në dhënien e një epilogu për rastin. E kritikë të ngjashme patën edhe përfaqësues të institucioneve.
Në vendin ku 18 vjet më parë plumbat e patën lënë të vrarë policin, Triumf Riza, të shtunën i pranishëm në ceremoninë e mbajtur në lagjen Dardania në Prishtinë, ishte padyshim edhe Shefqet Riza, babai i policit Triumf Riza, i cili e ka kritikuar sistemin e drejtësisë për vonesën që t’i japë epilog rastit.
“Fatkeqësisht, sistemi gjyqësor na e ka vrarë edhe njëherë djalin dhe krejt familjen. Një sistem që ka zgjatur kaq shumë, çerek shekulli apo 16 vjet e gjysmë, edhe prapë kryekrimineli të arratiset pikërisht për shkak të gabimeve të vet gjyqtarëve, sepse nuk është e mundur që çdokush që dënohet mbi 5 vjet, patjetër duhet të jetë në paraburgim deri të vendimi përfundimtar”, ka thënë ai.
Kritika për sistemin e drejtësisë ka shprehur edhe ministri në detyrë i Punëve të Brendshme, Xhelal Sveçla.
“Ky rast tregon një dështim eklatant të drejtësisë, duke i mundësuar që kryekrimineli që organizoi këtë atentat, t’i ikë dorës së drejtësisë. Policia e Kosovës, Ministra e Punëve të Brendshme por edhe Qeveria e Kosovës po bëjnë krejt çka është e mundshme që ky kryekriminel të sillet para organeve të drejtësisë”, ka thënë Sveçla.
Zotim të ngjashëm bëri edhe drejtori i Përgjithshëm i Policisë, Gazmend Hoxha.
“Drejtësia fatkeqësisht dështoi që kriminelët të marrin dënimin e merituar për këtë rast, e ne do të punojmë shumë që të gjithë përgjegjësit tjerë, që kanë qenë pjesë e këtij grupi kriminal që e kanë vra Triumfin dhe kanë shtyer këtë vrasje, të dalin para drejtësisë”, ka thënë drejtori Hoxha.
E kryeministri në detyrë, Albin Kurti, e ka vlerësuar lart punën që Riza e ka bërë si polic.
“Këtu në vendparkimin e lagjes Dardania në kryeqytet, u vra mizorisht nga pusia me një breshëri plumbash. Triumf Riza para se të jetë polic i guximshëm, ishte njeri i guximshëm. Menjëherë në vitin 1999 kur ishte vetëm 20-vjeçar u inkuadrua në Policinë e Kosovës, për t’i shërbyer rendit publik dhe sundimit të ligjit, ishte i përkushtuar dhe i pakompromis”, ka deklaruar Kurti.
Riza u vra më 30 gusht të 2007-tës. Për vrasjen e tij, të akuzuar janë Enver Sekiraqa, Ilir e Rrahim Abdullahu dhe Fitim Avdiu.
Më 17 maj të 2016-s, Sekiraqa u pat dënuar fillimisht me 37 vjet burgim për nxitje të vrasjes. Gjykata Themelore e shpalli atë fajtor për herë të dytë më 16 shtator të 2019-s dhe ia shqiptoi dënimin me 30 vjet burgim. Në mars të 2020-s, Apeli e riktheu rastin në rigjykim dhe katër vjet më vonë ai u dënua me 25 vjet burgim, porse u arratis pas ndryshimit të masës së sigurisë.