Kryetari i Komunës së Suharekës, Bali Muharremaj, ka vlerësuar lart rolin dhe kontributin e grave në institucionet komunale gjatë viteve të fundit.
“Gratë e Suharekës kanë dëshmuar se përfaqësimi i tyre në institucionet tona nuk është vetëm një numër, por një vlerë e veçantë për gjithë shoqërinë,” theksoi ai.
Sipas kryetarit Muharremaj, për herë të parë në Suharekë, gratë kanë mbajtur pozita kyçe duke filluar nga Nënkryetarja e Komunës deri te drejtimet më të ndjeshme, si shëndetësia, kultura, administrata, inspekcioni dhe institucione të tjera. “Ato kanë sjellë kujdes, humanitet dhe vizion të qartë,” shtoi ai.
Në përfundim, kryetari Muharremaj u shpreh se kjo është një arritje e madhe për komunën dhe një hap i rëndësishëm drejt barazisë dhe përfaqësimit dinjitoz.
