Bayern Munihu fitoi me rezultatin 3:2 në transfertë ndaj Augsburgut në kuadër të javës së dytë në Bundesligë.
Bavarezët e nisën furishëm ndeshjen duke rrezikuar në dy raste me Luis Diaz dhe Michael Olise, por pa arritur të gjejnë rrugën e rrjetës.
Gjithsesi, kaluan në epërsi më pas me Serge Gnabryn, i cili dërgoi topin në portën e zbrazët pas asistimit nga Harry Kane.
Pak minuta pa përfunduar pjesa e parë, Luis Diaz (48’) shënoi një gol fantastik për të dyfishuar epërsinë e bavarezëve (2-0).
Me të filluar pjesa e dytë e ndeshjes, Bayerni realizoi edhe golin e tretë me Olise (48’) i cili pas një veprimi individual mposhti portierin kundërshtar për 3-0.
Vendasit ia dolën të shënojnë në minutën e 51-të përmes Kristijan Jakic i cili nuk dështoi në situatën një për një kundër Manuel Neuer për 3-1.
Për t’i bërë gjërat më interesante u përkujdes Mert Komur i cili në minutën e 76-të realizoi për të ngushtuar edhe më tej rezultatin në 3-2 pas asistimit nga Jakic.
Sidoqoftë, kjo ishte e tëra çfarë Augsburgu mundi të bëjë në këtë sfidë pasi deri në fund Bayerni ia doli të menaxhojë mirë epërsinë për të marrë fitoren e radhës.
Pas dy ndeshjeve të para Bayerni kryeson me pikë të plota, Frankfurti ka po 6, por ka realizuar 2 gola më pak.