Presidenti amerikan Joe Biden do të njoftojë një mbështetje prej 4 miliardë dollarësh amerikanë për aleancën globale të vaksinave të njohur si COVAX, që synon të ndihmojë vendet e varfra të vaksinojnë popullsinë e tyre, sipas një zyrtari të lartë të administratës.
Sipas mediave të huaja, përcjell Telegrafi, Biden do të bëjë zotimin gjatë takimit virtual të së premtes me anëtarët e G7.
Siç thuhet më tej, Shtëpia e Bardhë ka në plan të lëshojë 2 miliardë dollarë menjëherë dhe të përdorë 2 miliardë dollarë të dytë si levë për të bërë që vendet e tjera të pasura të kontribuojnë në përpjekjen globale të vaksinimit, sipas zyrtarit të administratës.
Paratë do të vijnë nga fondet e ndara tashmë nga Kongresi për përpjekjet ndërkombëtare të vaksinimit dhe nuk do të ndikojnë në fushatën e administratës së Biden për të vaksinuar amerikanët, tha zyrtari.
Administrata e Biden tha këtë javë është në rrugën e duhur për të vaksinuar çdo të rritur amerikan deri në korrik.
Ndryshe, Administrata e ish-presidentit Donald Trump kishte refuzuar të merrte pjesë në COVAX.
Por Sekretari i Shtypit i Shtëpisë së Bardhë, Jen Psaki, u tha gazetarëve të enjten se administrata e Biden ishte e përkushtuar për të punuar përmes COVAX për të siguruar që ka shpërndarje të drejtë të vaksinave dhe fondeve në të gjithë botën.
COVAX planifikon të japë fillimisht më shumë se 330 milionë doza vaksinash në gjysmën e parë të vitit 2021, duke mbuluar mesatarisht 3.3% të popullsisë totale të 145 vendeve pjesëmarrëse.