Me rastin e 28 Nëntorit, ish-ministri dhe ish-kryetari i Komunës së Suharekës, Blerim Kuçi – njëkohësisht komandant i Brigadës 123 gjatë luftës – ka ndarë disa fotografi të datës 28 nëntor 1998, duke kujtuar një nga ditët e rëndësishme të historisë së brigadës dhe të luftës çlirimtare.
Ai ka theksuar se këto imazhe epike janë një përkujtim i brezave që kanë shkruar kapitujt e lavdisë shqiptare, nga koha e Skënderbeut, te akti historik i shpalljes së pavarësisë nga Ismail Qemali, e deri te flijimi i përjetshëm i Adem Jasharit dhe dëshmorëve të tjerë.
Kuçi ka bërë thirrje që vëmendja sot të jetë e përqendruar tek të rinjtë, duke nënvizuar se e ardhmja e Kosovës ndërtohet përmes dijes, punës dhe bashkëpunimit. Ai ka theksuar se vendi ka potencial të jashtëzakonshëm dhe kërkon djem e vajza që guxojnë të ëndërrojnë e të kontribuojnë në zhvillimin e shtetit.
Në mesazhin e tij, ai ka shtuar se 28 Nëntori duhet të jetë ditë bashkimi për të gjithë shqiptarët, ditë falënderimi për sakrificat e paraardhësve dhe ditë kujtese se secili bart një pjesë të përgjegjësisë për kombin dhe flamurin.
Në fund, ai ka uruar të gjithë qytetarët për festën e 28 Nëntorit.