Premtimet e kryetarit të Komunës së Suharekës, Bali Muharremaj, për mandatin e tij të tretë qeverisës janë bërë publike nga Instituti GAP, i cili ka përmbledhur zotimet elektorale të dhëna për periudhën katërvjeçare të qeverisjes lokale.
Sipas të dhënave të publikuara nga Instituti GAP, këto premtime janë të planifikuara të realizohen përgjatë gjithë mandatit dhe aktualisht asnjëra prej tyre nuk ka nisur ende, pasi qeveria komunale ende nuk është formuar.
Administratë
Në fushën e administratës është paraparë një premtim, që lidhet me barazinë gjinore në udhëheqje, ku është zotuar që 40 deri në 50 për qind e drejtorive komunale të udhëhiqen nga gra.
Arsim
Instituti GAP evidenton gjithsej 12 premtime në sektorin e arsimit, përfshirë:
- Pajisjen e shkollave me laboratorë
- Ndërtimin e sallave sportive
- Rritjen e subvencioneve për bursa
- Avancimin e shkollave me teknologji të reja
- Hapjen e një qendre inovative për të rinjtë
- Ndërtimin e çerdhes në fshatin Bllacë
- Ndërtimin e çerdhes në rrugën “Reçani” me kapacitet prej 140 fëmijëve
- Ndërtimin e shkollës në fshatin Nëpërbisht
- Ndërtimin e shkollës “7 Marsi”
- Përfundimin e shkollës në Samadraxhë
- Zbatimin e mësimit tërëditor në tri shkolla si projekt pilot nga viti 2026
- Vazhdimin e ndërtimit të shkollës në Vraniq
Infrastrukturë
Në sektorin e infrastrukturës janë listuar pesë premtime, që përfshijnë:
- Studimin e fizibilitetit për ngrohjen qendrore të qytetit
- Ndërtimin e stacionit të autobusëve me rreth 400 parkingje nëntokësore
- Zgjerimin e rrjetit të kanalizimit në fshatin Bukosh me së paku 5 km kanalizim të ri
- Ndërtimin dhe zgjerimin e kanalizimit në Samadraxhë
- Ndërtimin dhe zgjerimin e kanalizimit në Mushtisht
Shëndetësi
Në fushën e shëndetësisë, sipas Institutit GAP, është paraparë ndërtimi i objektit të ri të Qendrës Kryesore të Mjekësisë Familjare (QKMF).
Shërbime Publike
Janë identifikuar tre premtime, përfshirë:
- Investime në shëtitore dhe parqe të vogla në disa fshatra
- Ndërtimin e objektit të zjarrfikësve me vlerë rreth 850 mijë euro
- Ndërtimin dhe operacionalizimin e objektit të kompanisë “Eko-Theranda”
Sport
Në sektorin e sportit, GAP ka regjistruar dy premtime kryesore:
- Ndërtimin e stadiumit të qytetit
- Ndërtimin e pishinës gjysmë olimpike
Instituti GAP thekson se këto janë zotime të planifikuara për t’u realizuar brenda mandatit katërvjeçar, ndërsa dinamika e zbatimit të tyre pritet të bëhet e qartë vetëm pas formimit të qeverisë komunale dhe miratimit të planeve konkrete të punës.