Një incident i rëndë zjarri është raportuar të shtunën në fshatin Sallagrazhdë të Suharekës, ku një vatër zjarri ka përfshirë një zonë të tërë bujqësore dhe ka shkaktuar dëme të mëdha materiale, raporton Gazeta Sinjali.
Burimet e Sinjalit brenda emergjencës bëjnë me dije se ankuesi, Ardit Aliaj, ka njoftuar Policinë rreth pas 14:00 për zjarrin që kishte përfshirë stallën e bagëtive dhe hapësirat përcjellëse të ekonomisë së tij.
Sipas deklarimeve të tij, si pasojë e flakëve janë djegur: stalla e kafshëve, pajisjet për mjelje dhe ato përcjellëse, një traktor bujqësor, sasi e konsiderueshme ushqimi për bagëti, depoja me rezervat ushqimore.
Vlera e dëmeve sipas ankuesit llogaritet të jetë rreth 200 mijë euro.
Në vendin e ngjarjes kanë intervenuar njësitë policore, eksperti i zjarreve dhe prokurori kujdestar, me urdhër të të cilit rasti është iniciuar dhe është deleguar për hetim tek Hetimet Rajonale.
Ndërkohë, për shkak të gjendjes së rënduar emocionale të ankuesit dhe zhvillimit aktiv të zjarrit, raporti zyrtar nuk ishte dërguar menjëherë.
Hetimet për këtë rast janë në zhvillim.