Në mbledhjen e fundit të Asamblesë Komunale të Suharekës, nuk u arrit miratimi i Projekt-Rregullores për bonuset e zonimit, për të dytën herë me radhë. Kjo rregullore, e propozuar nga Drejtoria e Urbanizmit, kishte për qëllim të krijonte një bazë ligjore për shpronësime dhe hapjen e rrugëve të reja, si dhe rritjen e koeficientit të ndërtimit për kompanitë ndërtimore në zona të caktuara.
Sipas autoriteteve komunale, miratimi i këtij dokumenti do të kishte ndikuar pozitivisht në zhvillimin urban dhe ekonomik të Suharekës, duke sjellë përfitime të ndërsjella si për institucionin, ashtu edhe për qytetarët.
Megjithatë, në seancën e fundit:
AAK votoi pro, duke mbështetur rregulloren me 14 vota, ndërsa LDK, Vetëvendosje dhe një anëtare e PDK-së votuan kundër, duke e rrëzuar me gjithsej 16 vota kundër, nuk pati asnjë abstenim.
Ky vendim ka shkaktuar zhgënjim të thellë te një pjesë e ndërtimtarëve lokalë, të cilët thonë se mungesa e kësaj rregulloreje po i mban peng projektet ndërtimore që kanë qenë në pritje prej kohësh. Sipas tyre, kjo po ndikon negativisht në ritmin e zhvillimit infrastrukturor dhe në klimën e investimeve në komunë.
Refuzimi i këtij dokumenti për herë të dytë shihet si pasojë e përplasjeve politike brenda Asamblesë, të cilat po mbajnë peng nisma të rëndësishme për të ardhmen urbane të Suharekës.