Analisti politik Idaver Sherifi ka ngritur dyshime serioze mbi transparencën e projektit për ndërtimin e aeroportit të Vlorës, duke aluduar për lidhje të mundshme me interesa ruse përmes biznesmenit Behgjet Pacolli.
Gjatë një interviste në emisionin “Log.” në News24, Sherifi tha se që në momentin e nënshkrimit të kontratës koncesionare në vitin 2021, janë shfaqur pikëpyetje mbi origjinën e kapitalit të përdorur dhe përfituesit realë të projektit.
“Sapo u lidh kontrata me Pacollin, lindën dyshime për burimin e kapitalit. Ai e ka vendosur pasurinë në Rusi dhe Kazakistan. Ky dyshim ekziston që në fillim,” deklaroi Sherifi.
Sipas tij, aktiviteti ekonomik i Pacollit është përqendruar kryesisht në Kazakistan – një shtet me lidhje të ngushta me Rusinë – ndërsa strukturat e kompanive të tij në Zvicër janë vetëm formale.
“Zyrat e kompanive të tij në Zvicër janë minimale, nga 20 metra katrorë. Gjithë aktiviteti real ndodhet në Kazakistan,” shtoi Sherifi.
Ai paralajmëroi se përfshirja e mundshme e interesave të huaja në projekte të mëdha infrastrukturore, si ai i aeroportit të Vlorës, mund të përbëjë rrezik për sigurinë ekonomike dhe strategjike të vendit, duke kërkuar më shumë transparencë dhe hetim të detajuar mbi kapitalin dhe përfituesit e vërtetë të kontratave publike.