Cak i hajnave shumë herë kanë qenë dhe vazhdojnë të jenë veturat, të cilat qytetarët nuk po kanë siguri t’i lënë askund. Automjete të ndryshme po vidhen qoftë në parkingje apo hapësira tjera publike, raporton Gazeta Sinjali.
Një rast i tillë është raportuar gjatë ditës së sotme, në hyrje-daljen e autostradës në fshatin Duhel, ku një qytetar ka mbetur pa veturën e tij pasi e kishte parkuar përkohësisht në mëngjesin e kësaj dite.
Burime të Sinjalit bëjnë me dije se B.B, rreth 47-vjeçar nga Malisheva, ka deklaruar në Policinë e Suharekës se rreth orës 07:00 kishte lënë të parkuar veturën e tij Opel Astra, me ngjyrë të hirtë, në zonën e hyrje-daljes së autostradës.
Kur është kthyer pas pune, rreth orës 17:30, ai ka vërejtur se automjeti ishte zhdukur.
Sipas kallëzimit, në veturë ndodheshin edhe çelësat dhe dokumentacioni i plotë i makinës, përfshirë librezën dhe sigurimin, çka ka lehtësuar kryerjen e vjedhjes.
Policia ka nisur hetimet për identifikimin e autorit ose autorëve të dyshuar dhe për gjetjen e automjetit të vjedhur.