Një ngjarje tragjike ka ndodhur dje rreth orës 13:30 në lagjen “Bajram Curri” në Prizren, ku një punëtor humbi jetën pas rënies nga skeletet e një objekti në ndërtim.
Viktima është identifikuar si Faik Mehmetaj, 34-vjeçar nga fshati Caravik i Malishevës. Sipas njoftimit të Policisë, ai u dërgua fillimisht në Emergjencën e Spitalit Rajonal të Prizrenit në gjendje të rëndë, por pavarësisht përpjekjeve mjekësore, rreth orës 16:30 u konstatua vdekja e tij në QKUK – Prishtinë.
Në lidhje me rastin, N.B., pronar i kompanisë ndërtimore, është ndaluar për 48 orë me vendim të Prokurorit të Shtetit, nën dyshimin për veprën penale “Asgjësimi, dëmtimi apo heqja e pajisjeve dhe rrezikimi në vendin e punës.”
Policia e Kosovës, në bashkëpunim me Prokurorin e Shtetit, Inspektoratin e Punës dhe njësitë hetimore kompetente, po zhvillon të gjitha veprimet e nevojshme për të sqaruar plotësisht rrethanat e kësaj ngjarjeje të rëndë.