Njësia Anti-Drogë e Drejtorisë Rajonale të Policisë në Prizren ka zbarkuar sot në Suharekë, ku ka nisur një aksion të gjerë operativ në kërkim të substancave narkotike.
Burime të besueshme të Sinjalit nga strukturat e afërta me hetimin bëjnë të ditur se aksioni po zhvillohet në bazë të informatave konkrete të siguruara nga informatorë dhe burime të inteligjencës policore, të cilat kanë treguar për dyshime serioze lidhur me posedim dhe shpërndarje të narkotikëve në disa lokacione.
Sipas këtyre burimeve, njësitë policore kanë kryer bastisje të targetuara, ndërsa fokusi kryesor i operacionit është gjetja dhe sekuestrimi i narkotikëve, si dhe identifikimi i personave të përfshirë në këtë veprimtari të kundërligjshme.
Për momentin nuk ka informacion zyrtar për arrestime, mirëpo aksioni është ende në zhvillim dhe nuk përjashtohet mundësia e ndalimeve gjatë orëve në vijim, në varësi të rezultateve të bastisjeve.