Një operacion i hetuesve të Njësisë për Hetimin e Trafikimit me Narkotikë në Ferizaj ka rezultuar me arrestimin e dy personave të dyshuar për disa vepra të rënda penale që lidhen me substanca narkotike, raporton Gazeta Sinjali.
Burimet e Sinjalit brenda hetuesisë bëjnë me dije se mbrëmjen e së martës, rreth orës 20:30, është ndërhyrë në dy lokacione të ndryshme, pas dyshimeve të bazuara se dy të rinj ishin të përfshirë në kultivim dhe shpërndarje të narkotikëve.
Fillimisht, me pëlqimin e të dyshuarit S.S., rreth 28-vjeçar, policia ka bastisur banesën e tij në rrugën “Enver Topalli” në Ferizaj, ku janë gjetur dhe sekuestruar: Një bimë e dyshuar kanabis sativa në ballkon, 2.5 gram substancë e dyshuar kokainë, 1 gram marihuanë, një shishe metadon, dy peshore digjitale, një fishek pistolete, dy mulli për bluarje dhe qese plastike për paketim të marihuanës dhe 50 euro para kesh.
Ndërkohë, është bastisur edhe banesa e marrë me qira nga i dyshuari M. Sh., rreth 27-vjeçar në rrugën “Sejdi Sejdiu” në të njëjtin qytet, ku janë gjetur: Një kavanoz me 3 qese marihuanë (2.5 gr) dhe sasi tjetër e papaketuar (8.3 gr), rreth 26 fara të dyshuara për kultivim kanabisi, një mulli bluarjeje, si dhe rreth 345 euro para të gatshme.
Në vendin e ngjarjes ka intervenuar edhe Forenzika Rajonale, e cila ka fiksuar dhe evidentuar të gjitha provat materiale.
Të dy të dyshuarit janë shoqëruar në stacionin policor dhe janë intervistuar në prani të avokatëve mbrojtës. Me urdhër të prokurorit kujdestar për krime të rënda, ndaj tyre është lëshuar vendim për ndalim prej 48 orësh.
Rasti është iniciuar për veprat penale: “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, dhe “Kultivimi i bimës së hashashit, shkurres së kokainës ose bimëve të kanabisit”.
Hetimet po vazhdojnë.