FC Ballkani pritet të ketë një rikthim të bujshëm në krye të pankinës. Sipas informacioneve që kanë qarkulluar sot, klubi suharekas është shumë afër arritjes së marrëveshjes me trajnerin Ismet Munishi, i cili do të rikthehej për herë të dytë në drejtimin e skuadrës portokalli.

Munishi pritet të zëvendësojë trajnerin Orges Shehi, i cili u largua nga detyra dje pas rezultateve të fundit.

Sipas informacioneve të siguruara, prezantimi i Munishit pritet të bëhet gjatë javës së ardhshme, duke i hapur rrugë një epoke të re në klub.

Ismet Munishi e ka drejtuar Ballkanin edhe më herët, nga korriku i vitit 2019 deri në dhjetor të vitit 2020, periudhë gjatë së cilës skuadra u konsolidua dhe u ngrit në nivele të larta konkurruese në futbollin kosovar.

Nëse marrëveshja finalizohet, rikthimi i tij shihet si një lëvizje e fuqishme e klubit kampion, i cili synon të stabilizohet pas ndryshimeve të fundit dhe të rikthehet fuqishëm në garat vendore dhe ndërkombëtare.