Kreu i Nisma Socialdemokrate, Fatmir Limaj, ka dhënë arsyet e dështimit të një koalicioni parazgjedhor me Lidhjen Demokratike të Kosovës.
Limaj ka thënë se elektoratet e ndryshme të të dy subjekteve politike dhe koha e shkurtër deri në zgjedhje kanë qenë dy nga arsyet kryesore për mungesën e bashkëpunimit mes NISMA-s dhe LDK-së.
“Kemi pasur diskutime dhe komunikime të vazhdueshme me Abdixhikun, e kam vlerësuar mënyrën e të menduarit të tij dhe më bën përshtypje mënyra e tij e menduarit. NISMA dhe LDK kanë dy elektorate të ndryshme, është kohë e shkurtër, dhe nuk mund të thyejmë barrierat e së kaluarës; tani për tani është e pamjaftueshme. Kam qenë i interesuar të jem shumë i ndershëm me ta, kam pasur dyshime se nuk do të mund të jap kontribut në atë koalicion për shkak të lëvizjes së elektoratit. Do të gjejmë rrugë të bashkëpunimit paszgjedhor, i vlerësoj ato takime dhe angazhimet e Abdixhikut”, ka deklaruar Limaj në Debat Plus.
Gjatë debatit, gazetari Ermal Pandurini i tha Limajt se brenda Lidhjes Demokratike të Kosovës kanë ekzistuar zëra kundërshtues ndaj një koalicioni me Nismën, duke përmendur konkretisht Fetah Rudin, Blerim Kuçin dhe Besian Mustafën. Limaj u përgjigj se ka hapësirë edhe për këto shqetësime dhe se i ka vërejtur të njëjtat gjatë takimeve të tij me Abdixhikun.
Kreu i Nismës bëri të ditur se subjekti i tij do të garojë i vetëm në zgjedhjet e 28 dhjetorit.