Përderisa jemi në sezonin e dasmave dhe në kohën e pushimeve verore, të shtënat me armë zjarri nuk po ndalen as në gazmendet e ndryshme familjare, duke u rrezikuar në këto ngjarje edhe jeta e qytetarëve, raporton Gazeta Sinjali.
Një rast i tillë është shënuar mbrëmë në fshatin Bukoshë të Suharekës, ku nga një aheng familjar janë raportuar të shtëna me armë zjarri.
Gazeta Sinjali mëson se i dyshuari për këtë incident është A.K, 46-vjeçar, i cili sipas burimeve zyrtare ka pranuar se kishte shtënë me armë në ajër gjatë festës.
Pas informimit nga Njësia Operative, në vendin e ngjarjes kanë intervenuar patrulla të rregullta dhe sektori i hetimeve, ku është identifikuar vendndodhja e ahengut dhe i dyshuari.
Nga kontrolli është gjetur dhe sekuestruar një pistoletë me gaz, një karikator dhe një fishek, për të cilët dyshohet se janë përdorur gjatë incidentit.
Me urdhër të prokurorit kujdestar, i dyshuari është arrestuar dhe pas intervistimit në prani të avokatit mbrojtës, ndaj tij është shqiptuar masa e ndalimit për 48 orë për veprat penale: “Shkaktim i rrezikut të përgjithshëm”, “Mbajtje në pronësi ose shfrytëzim i paautorizuar i armës.”
Hetimet për rastin janë në zhvillim e sipër nga Policia dhe Prokuroria.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.