Një vjedhje e rëndë është regjistruar mbrëmjen e 27 qershorit 2025, në fshatin Marali të Malishevës, ku persona ende të panjohur kanë depërtuar me forcë në një shtëpi private dhe kanë grabitur një shumë të konsiderueshme parash dhe ar.
Sipas burimeve të Sinjalit, rreth orës 22:50, hajnat kanë shfrytëzuar mungesën e familjarëve për të hyrë në shtëpinë e H.V., duke thyer një dritare në katin përdhes dhe më pas duke kaluar në katin e dytë, ku kanë arritur të marrin rreth 25 mijë euro para të gatshme si dhe një sasi ari, vlera e së cilës ende nuk është përcaktuar.
Nga të dhënat e para, në momentin kur është kryer vjedhja, asnjë nga anëtarët e familjes nuk ka qenë në shtëpi, pasi ishin duke qëndruar tek vëllai i tij.
Policia dhe njësitë hetimore kanë dalë në vendin e ngjarjes, ndërsa për rastin është njoftuar edhe prokurori kujdestar, i cili ka urdhëruar nisjen e hetimeve për veprën penale “Vjedhje e rëndë”.
Aktualisht, ende nuk ka ndonjë person të dyshuar, ndërsa hetimet janë duke u zhvilluar nga DRP-Gjakovë.