Në kalanë e Kastërcit, një prej monumenteve më të rëndësishme historike në territorin e Suharekës, janë duke u zhvilluar gërmime arkeologjike që po hedhin dritë mbi trashëgiminë paleokristiane të rajonit. Lajmin e ka bërë të ditur ministri i Kulturës, Rinisë dhe Sportit, Hajrullah Çeku, i cili ka theksuar rëndësinë e këtyre zbulimeve për historinë dhe kulturën e Kosovës.
Nën drejtimin e arkeologut Berat Ademi nga Instituti Arkeologjik i Kosovës, gërmimet kanë zbuluar fragmente qeramike, xhami, afreska si dhe tjegulla me mbishkrime, që dëshmojnë se bazilika paleokristiane e këtij kompleksi është ndërtuar në fillim të shekullit VI. Ky objekt fetar ka qenë dëshmitar i zhvillimeve të mëdha historike, por pas dyndjeve sllave është shndërruar në hapësirë varrimi, ku deri më tani janë identifikuar rreth 80 varre.
Përveç gërmimeve, në kompleksin e Kastërcit po kryhen edhe punime konservuese dhe restauruese, me qëllim që kjo trashëgimi e rrallë të ruhet dhe të shndërrohet në një vlerë të shtuar për turizmin kulturor të Kosovës.
Këto zbulime jo vetëm që pasurojnë historinë e qytetërimit tonë, por gjithashtu ofrojnë mundësi të reja për zhvillimin e turizmit kulturor dhe edukimin e brezave mbi rëndësinë e ruajtjes së trashëgimisë sonë arkeologjike.
Kastërci, nga një kala e lashtë në një destinacion të së ardhmes kulturore.