Presidentja Vjosa Osmani ka caktuar sot datën 28 dhjetor 2025 për mbajtjen e zgjedhjeve të jashtëzakonshme parlamentare në Kosovë, pas dështimit të krijimit të qeverisë që doli nga zgjedhjet e muajit shkurt.

Partitë politike tashmë kanë nisur përgatitjet për hartimin e listave dhe përzgjedhjen e kandidatëve.

Sipas burimeve të Suhareka Express brenda strukturave të Aleancës për Ardhmërinë e Kosovës në Suharekë, dy emrat e parë që pritet të garojnë për deputet nga kjo degë janë Burim Ramadani dhe Albana Bytyqi.

Të njëjtat burime konfirmojnë se lista e AAK-së nga Suhareka pritet të zgjerohet edhe me kandidatë të tjerë në ditët në vijim, ndërsa procesi i finalizimit të listës pritet të përfundojë brenda afateve të përcaktuara nga KQZ.

AAK tradicionalisht ka pasur përfaqësim nga Suhareka në Kuvendin e Kosovës, ndërsa gara e këtij viti pritet të jetë veçanërisht dinamike për shkak të situatës politike dhe rrethanave të krijimit të zgjedhjeve të jashtëzakonshme.