Eksperti i komunikacionit, Selman Kolgeci, ka bërë thirrje për siguri të shtuar në komunikacion, duke paralajmëruar rrezik të lartë nga krijimi i ngricave në rrugë pas reshjeve të fundit dhe rënies së ndjeshme të temperaturave.
Sipas Kolgecit, sonte parashikohet që temperaturat të zbresin deri në –9°C, çka rrit dukshëm mundësinë e krijimit të shtresave të akullit në rrugë, veçanërisht në ura, kthesa, pjerrësi dhe në segmentet që nuk arrijnë të pastrohen dhe të kriposen me kohë.
“Ekziston rrezik i lartë që rrugët të krijojnë shtresë me ngrica, sidomos në ura, kthesa dhe pjerrësi,” ka theksuar Kolgeci, duke u bërë apel të gjithë ngasësve që të tregojnë kujdes maksimal gjatë qarkullimit.
Ai ka rekomanduar uljen e shpejtësisë, rritjen e distancës së sigurisë, përdorimin e gomave dimërore dhe pajisjeve adekuate, si dhe shmangien e manovrave të papritura dhe frenimeve të vrullshme.
“Siguria në komunikacion është përgjegjësi e përbashkët,” ka cituar Kolgeci, duke kërkuar përqendrim maksimal nga të gjithë drejtuesit e automjeteve, me qëllim parandalimin e aksidenteve dhe ruajtjen e jetës.