Kandidati për kryetar nga PDK, Dardan Berisha, ka prezantuar kandidaturën e Elona Krasniqit, e cila garon për Asamblenë Komunale të Suharekës me numrin 29.
E lindur dhe rritur në Suharekë, Elona përfaqëson një brez të ri që ndërthur vlerat tradicionale me qasjen moderne dhe vizionin ndërkombëtar. Rruga e saj arsimore fillon në shkollën fillore “7 Marsi” dhe vijon në gjimnazin “Avdyl Rama” në Shirokë, në drejtimin “Laborant i Kimisë”. Më pas, ajo nisi studimet për Gjuhë Angleze në Kolegjin AAB, të cilat i përmbylli në Norvegji, në NLA University College – Bergen, në programin “Intercultural Studies”.
Gjatë viteve të fundit, Elona ka ndërtuar një profil profesional të larmishëm, duke punuar në pozita të ndryshme në menaxhim, marketing dhe komunikim me klientë. Ajo ka qenë agjente për tregun ndërkombëtar në call center për klientë anglisht-folës, si dhe ka bashkëpunuar me kompani të njohura në fushën e promovimit dhe shërbimeve.
Elona sjell në këtë garë një energji të re, një frymë të hapur dhe një përvojë që shkon përtej kufijve të vendit, me qëllim që të reflektojë ide dhe standarde të reja edhe në vendimmarrjen lokale.
Synimi i saj është të kontribuojë në ndërtimin e një Suhareke më moderne, më transparente dhe të orientuar drejt përfshirjes së të rinjve, grave dhe të gjitha shtresave të qytetarëve. Elona është e bindur se ndryshimi i vërtetë nis nga përfaqësimi i denjë dhe vendimmarrja gjithëpërfshirëse.
“Me Elona Krasniqin, Suhareka fiton një zë të ri që sjell dije, guxim dhe përkushtim për të ardhmen” – u shpreh Dardan Berisha gjatë prezantimit të saj.
