Lumir Abdixhiku është nominuar zyrtarisht si kandidat për kryeministër nga Lidhja Demokratike e Kosovës. Lajmin e ka bërë të ditur vetë ai në një konferencë për media, ku njoftoi se LDK-ja do të garojë e vetme në zgjedhjet e 28 dhjetorit.
Abdixhiku tha se vendimi për kandidaturën e tij është marrë unanimisht nga Kryesia e LDK-së, ndërsa atij i është dhënë edhe autorizimi për renditjen e listës së kandidatëve për deputetë.
Megjithatë, ajo që ka tërhequr vëmendjen është hapja e pjesërishme e listës së LDK-së për parti të tjera, me theks të veçantë për Nismën e Fatmir Limajt.
“LDK-ja do të kujdeset që një pjesë të listës së vet ta hap për partitë e tjera, përfshirë edhe Limajn me deputetët e tij,” u shpreh Abdixhiku, duke theksuar se bisedimet pritet të zhvillohen ditëve në vijim.
Ai shtoi se ekziston gatishmëri jo vetëm për Nismën Socialdemokrate, por edhe për parti të tjera si Partia Demokristiane, Partia e Drejtësisë dhe Aleanca e Pacollit, si dhe për individë që synojnë të garojnë në listën e LDK-së.
“Ne jemi të hapur edhe për partitë edhe për individët që duan të garojnë për LDK-në, për ngritjen e LDK-së,” deklaroi Abdixhiku.
Me këtë hap, LDK sinjalizon mundësinë e rikthimit të Fatmir Limajt dhe strukturave të tij në një platformë të përbashkët politike, zhvillim që pritet të ndikojë drejtpërdrejt dinamikën e fushatës dhe raportet mes partive opozitare.