FC Ballkani ka zyrtarizuar trajnerin e ri të skuadrës: kroatin Mislav Karoglan, i cili nënshkruan kontratë dyvjeçare e gjysmë dhe bëhet trajneri i parë i huaj në historinë e klubit.
Karoglan, 43 vjeç, vjen me përvojë të gjerë në futbollin evropian. Ai ka qenë kryetrajner i Hajduk Split në dy periudha të ndryshme, së fundmi në sezonin 2023–24, ndërsa në edicionin 2024–25 drejtoi klubin moldav Sheriff Tiraspol, me të cilin garoi edhe në arenën ndërkombëtare.
Para këtyre angazhimeve, kroati ka drejtuar edhe disa skuadra në elitën e futbollit kroat, si Zadar dhe Istra 1961, duke ndërtuar profilin e një trajneri modern dhe energjik.
Me ardhjen e Karoglanit, FC Ballkani synon t’i japë një impuls të ri ekipit dhe të vazhdojë traditën e rezultateve pozitive në futbollin vendor e ndërkombëtar.