Dega e Lidhjes Demokratike të Kosovës në Suharekë ka zyrtarizuar kandidaturën e Fitim Berishës për Asamblenë Komunale në zgjedhjet lokale të 12 tetorit. Në një njoftim publik, Fitimi ka shprehur mirënjohjen për besimin e dhënë nga strukturat e partisë, duke theksuar se kandidatura e tij buron nga një dëshirë e sinqertë për të kontribuar në zhvillimin e komunës dhe përfaqësimin e denjë të qytetarëve.
I njohur si afarist lokal dhe i suksesshëm në sektorin e gastronomisë, Fitim Berisha është një figurë e afërt dhe komunikative me qytetarët, i pranishëm në përditshmërinë e komunitetit. Ai vjen nga një familje e respektuar, dhe është i vetmi kandidat nga LDK që përfaqëson lagjen Berisha – një detaj që e bën përfaqësimin e tij edhe më simbolik.
“Me nder dhe përgjegjësi ju njoftoj se jam propozuar nga Dega e LDK-së në Suharekë, nën udhëheqjen e kryetarit Ardian Shala, si kandidat për Asamblenë Komunale. Shpresoj në përkrahjen tuaj morale dhe qytetare në këtë rrugëtim që kemi përpara,” ka shkruar Berisha.
Kandidatura e Fitim Berishës shihet si një freski në skenën politike lokale, duke sjellë në Asamble një zë të ri që e njeh nga afër realitetin ekonomik, social dhe shoqëror të qytetit.
Me energji, përkushtim dhe komunikim të hapur me qytetarët, Fitim Berisha garon si pjesë e listës së LDK-së, me qëllim të ndërtimit të një Suhareke më të zhvilluar, më të barabartë dhe më të afërt me nevojat reale të komunitetit.