Përfaqësuesja U19 e Kosovës në hendboll e ka fituar me rezultat bindës ndeshjen e parë për plasman në Kampionatin Evropian të Divizionit B në Gjeorgji.
Të premten hendbollistet e Kosovës triumfuan me rezultatin 35:26 ndaj Izraelit.
Ndeshja ishte e vlefshme për plasman nga pozitat pesë deri në tetë.
Që në fillim të ndeshjes lojtaret e Kosovës krijuan epërsi bindëse prej 5:0 e 11:1. Më pas e kontrolluan rezultatin deri në fund.
Martina Bibaj udhëhoqi Kosovën në fitore me dhjetë gola nga 12 tentime. Diona Dresh i kishte shtatë gola nga nëntë tentime, ndërsa Arjeta Imeraj i realizoi gjashtë gola nga shtatë tentime.
Me nga tri gola njdeshjen e përfunduan Sara Gjergjaj e Zoja Kameraj, nga dy i shënuan Orgesa Gola e Elona Zeneli, kurse nga një Klaudia Ukaj e Arona Krasniqi. Portierja Donjeta Shabani u dallua me 13 pritje dhe u shpall më e mira e ndeshjes.
Tani Kosova U19 luan për vendin e pestë në Evropianin B në Gjeorgji. Ndeshja për vend të pestë është të dielën.
Në fazën grupore, Kosova kishte dy fitore e dy humbje.