Asociacioni i Gazetarëve të Kosovës ka shprehur shqetësimin pasi gazetari Lirim Mehmetaj pranoi ftesë për t’u paraqitur në Prokurori si i dyshuar për veprën “nxitje të përçarjes dhe mosdurimit”.
Në reagimin e AGK-së theksohet ndër të tjera se “thirrja e tillë ndaj një gazetari është alarm për një shoqëri demokratike, siç pretendon të jetë Kosova.”
Reagimi i plotë:
AGK-ja e shqetësuar me thirrjen në gjykatë për vepër penale ndaj gazetarit Lirim Mehmetaj
Asociacioni i Gazetarëve të Kosovës e ka pranuar me shqetësim të madh njoftimin nga gazetari i Albanian Post, Lirim Mehmetaj, për thirrjen që i është bërë si i pandehur nga ana e Prokurorisë Themelore në Prishtinë.
Në thirrjen për paraqitje më 7 mars, Mehmetaj është ftuar si i pandehur për veprën penale “nxitje të përçarjes dhe mosdurimit” nga Neni 141 i KPR-së.
Derisa AGK është në pritje të informacioneve zyrtare, thirrja e tillë ndaj një gazetari është alarm për një shoqëri demokratike, siç pretendon të jetë Kosova.
AGK-ja, do të kërkojë informacionet zyrtare dhe do ta ndjekë nga afër të enjten këtë zhvillim të pashembullt të sistemit të drejtësisë në Kosovë.