Zjarrfikësit e Suharekës janë furnizuar me uniforma të reja pune, falë një donacioni nga kompania vendore “DIMALI TEX”, pronar i së cilës është z. Besim Kuçi. Ky kontribut vjen si mbështetje e drejtpërdrejtë për ekipin e zjarrfikësve, të cilët çdo ditë janë në shërbim të qytetarëve në situata emergjente, shpeshherë duke rrezikuar jetën.
Shefi i Njësisë së Zjarrfikësve në Suharekë, Vehbi Krasniqi, ka falënderuar publikisht kompaninë për këtë ndihmë të çmuar, duke theksuar se uniformat e reja rrisin sigurinë dhe komoditetin e stafit gjatë kryerjes së detyrave të përditshme.
Ai u shpreh se donacione të tilla nga bizneset lokale jo vetëm që lehtësojnë punën e ekipit, por janë edhe shembull i solidaritetit dhe përkrahjes komunitare.
“DIMALI TEX” është një kompani e njohur tekstili në Suharekë, dhe ky donacion konsiderohet si një gjest i rëndësishëm që tregon përgjegjësinë shoqërore të biznesit lokal.
Zjarrfikësit e Suharekës shprehën mirënjohjen e tyre për këtë mbështetje, ndërsa theksuan se do të vazhdojnë të qëndrojnë pranë qytetarëve me profesionalizëm dhe gatishmëri të plotë.
