Klubi Basketbollistik Golden Eagle Ylli, që këtë vit shënon 50-vjetorin e themelimit, ka zhvilluar sot një vizitë tek kryetari i Komunës së Suharekës, Bali Muharremaj.

Për nder të këtij jubileu të rëndësishëm, përfaqësuesit e klubit i dhuruan kryetarit një fanellë të personalizuar, me numrin 50 – simbolikë e viteve të ekzistencës së klubit – si dhe me mbishkrimin “Bali Muharremaj”.

Gjatë takimit u theksua tradita shumëvjeçare e klubit dhe roli që Golden Eagle Ylli ka luajtur në zhvillimin e sportit në Suharekë, duke e bërë qytetin një ndër qendrat më të rëndësishme të basketbollit në vend.

Kryetari Muharremaj u shpreh mirënjohës për dhuratën dhe vlerësoi kontributin e klubit:

“⭐️ jonë shëndrit tash e 50 vite. GoldenEagle ‘Ylli’ është emocioni dhe frymëzimi i secilit prej nesh. Qyteti i Kampionëve do të marshoj sërish me trofe.”

Golden Eagle Ylli hyn në vitin jubilar si një prej klubeve më të suksesshme dhe të dashura për qytetarët e Suharekës, ndërsa për këtë sezonë ka synime të larta sportive.