Hamdi Bytyqi ka shprehur ngushëllime të sinqerta nëpërmjet një postimi në Facebook, pas lajmit për ndarjen nga jeta të Dr. Sali Bytyqit, mjekut të nderuar dhe humanistit që për dekada i shërbeu shëndetit të qytetarëve dhe çështjes kombëtare.
Në reagimin e tij, Bytyqi ka theksuar se Dr. Bytyqi shërbeu me përkushtim të madh në shërbim të popullit, veçanërisht gjatë kohës së luftës, ku qëndroi në ballë të misionit të shenjtë të mjekësisë – shpëtimit të jetëve dhe mbrojtjes së dinjitetit njerëzor. “Përkushtimi i tij human dhe profesional u bë shpresë për Kosovën,” ka shkruar ai.
Ai kujtoi gjithashtu kontributin e Dr. Sali Bytyqit në institucionet vendore, ku kishte shërbyer si Drejtor i Shëndetësisë në Komunën e Suharekës, duke lënë gjurmë të pashlyeshme me punën e tij profesionale dhe humane.
“Trashëgimia e tij morale dhe profesionale do të mbetet pjesë e kujtesës sonë kolektive. Ngushëllimet dhe solidaritetin më të ndjerë bashkëshortes, fëmijëve, familjes dhe miqve të shumtë të humanistit dhe mikut tonë. Qoftë i përjetshëm kujtimi i Dr. Sali Bytyqit,” përfundon mesazhi i Hamdi Bytyçit.